ವೇಣೂರು: ತುಳುನಾಡಿನ ಸಾಂಪ್ರದಾಯಿಕ ಜಾನಪದ ಕ್ರೀಡೆಯಾಗಿರುವ ಕಂಬಳಕ್ಕೆ ತನ್ನದೇ ಆದ ಐತಿಹಾಸಿಕ ಹಿನ್ನೆಲೆ ಮತ್ತು ಸಂಪ್ರದಾಯವಿದೆ. ಕೃಷಿ ಸಂಸ್ಕೃತಿಯ ಅವಿಭಾಜ್ಯ ಅಂಗವಾಗಿರುವ ಈ ಕೆಸರುಗದ್ದೆಯ ಓಟವು ಕರಾವಳಿಗರ ಪಾಲಿಗೆ ಕೇವಲ ಕ್ರೀಡೆಯಲ್ಲ, ಅದು ಸಂಭ್ರಮದ ಉತ್ಸವವೂ ಹೌದು. ಇದೀಗ ಕಂಬಳ ಪ್ರೇಮಿಗಳಿಗೆ ಮತ್ತೊಂದು ಸಂತಸದ ಸುದ್ದಿ ಸಿಕ್ಕಿದ್ದು, ಐತಿಹಾಸಿಕ ವೇಣೂರು ಪೆರ್ಮುಡ ಸೂರ್ಯ-ಚಂದ್ರ ಜೋಡುಕರೆ ಕಂಬಳವು ಪ್ರಸಕ್ತ ವರ್ಷದಲ್ಲೇ ಎರಡನೇ ಬಾರಿಗೆ ನಡೆಯಲು ಸಜ್ಜಾಗಿದೆ.
ಕಳೆದ ಮಾರ್ಚ್ 21ರಂದು ಕಂಬಳ ಸಮಿತಿ ಅಧ್ಯಕ್ಷರಾದ ನಿತೀಶ್ ಎಚ್. ಕೋಟ್ಯಾನ್ ಅವರ ನೇತೃತ್ವದಲ್ಲಿ ವೇಣೂರು ಕಂಬಳವು ಅತ್ಯಂತ ಯಶಸ್ವಿಯಾಗಿ ನಡೆದಿತ್ತು. ಇದೀಗ ಮತ್ತೊಮ್ಮೆ ಇದೇ ಡಿಸೆಂಬರ್ 19ರಂದು ಕಂಬಳ ನಡೆಯಲು ವೇದಿಕೆ ಸಿದ್ಧಗೊಳ್ಳುತ್ತಿದೆ.




ಅವಿಭಜಿತ ಜಿಲ್ಲಾ ಕಂಬಳ ಸಮಿತಿಯು ಈ ಬಾರಿಯ ಕಂಬಳದ ವೇಳಾಪಟ್ಟಿಯನ್ನು ಪರಿಷ್ಕರಿಸಿ, ದಿನಾಂಕಗಳಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಿದೆ. ಈ ಪರಿಷ್ಕೃತ ವೇಳಾಪಟ್ಟಿಯ ಅನ್ವಯ ವೇಣೂರು ಕಂಬಳದ ದಿನಾಂಕ ಬದಲಾಗಿದ್ದು, ಡಿ. ೧೯ಕ್ಕೆ ನಿಗದಿಯಾಗಿದೆ. ಇದರಿಂದಾಗಿ ಒಂದೇ ಕ್ಯಾಲೆಂಡರ್ ವರ್ಷದಲ್ಲಿ ಎರಡು ಬಾರಿ ವೇಣೂರು ಪೆರ್ಮುಡ ಕಂಬಳ ನಡೆಯುವುದು ಖಚಿತವಾಗಿದ್ದು, ಕಂಬಳ ಅಭಿಮಾನಿಗಳು ಹಾಗೂ ಕೋಣಗಳ ಯಜಮಾನರಲ್ಲಿ ಭಾರಿ ಖುಷಿ ಮತ್ತು ಉತ್ಸಾಹ ಮೂಡಿಸಿದೆ.

ಒಟ್ಟಿನಲ್ಲಿ, ಒಂದೇ ವರ್ಷದಲ್ಲಿ ಎರಡು ಬಾರಿ ಐತಿಹಾಸಿಕ ವೇಣೂರು ಕಂಬಳದ ರೋಚಕ ಕ್ಷಣಗಳನ್ನು ಕಣ್ತುಂಬಿಕೊಳ್ಳುವ ಸುವರ್ಣಾವಕಾಶ ಕಂಬಳ ಪ್ರೇಮಿಗಳಿಗೆ ಒದಗಿಬಂದಿದೆ. ಡಿಸೆಂಬರ್ ೧೯ರಂದು ಪೆರ್ಮುಡದ ಸೂರ್ಯ-ಚಂದ್ರ ಜೋಡುಕರೆಯಲ್ಲಿ ಕೋಣಗಳ ಮಿಂಚಿನ ಓಟವನ್ನು ನೋಡಲು ಕರಾವಳಿಯ ಕಂಬಳಾಭಿಮಾನಿಗಳು ಈಗಿನಿಂದಲೇ ಕಾತರದಿಂದ ಕಾಯುತ್ತಿದ್ದಾರೆ.
