ಮೂಡುಬಿದಿರೆ: ಇಲ್ಲಿನ ಬಸ್ ನಿಲ್ದಾಣದಲ್ಲಿ ಕಾರುಗಳು, ದ್ವಿಚಕ್ರ ವಾಹನಗಳು ಸೇರಿದಂತೆ ಇತರ ವಾಹನಗಳ ಅನಧಿಕೃತ ಪಾರ್ಕಿಂಗ್‌ನಿಂದ ಬಸ್ಸುಗಳ ಸಂಚಾರ ಹಾಗೂ ನಿಲುಗಡೆಗೆ ತೊಂದರೆಯಾಗುತ್ತಿದೆ. ಬಸ್ ನಿಲ್ದಾಣದಲ್ಲಿ ವಾಹನಗಳ ನಿಲುಗಡೆಗೆ ಪುರಸಭೆಯವರು ಮಾರ್ಕ್ ಹಾಕಿ ಹೋಗಿದ್ದರೂ, ತಿಂಗಳುಗಳು ಕಳೆದರೂ ವ್ಯವಸ್ಥೆ ಸರಿಯಾಗಿಲ್ಲ. ಹೀಗಾಗಿ ಇದು ಬಸ್ ನಿಲ್ದಾಣವೋ ಅಥವಾ ವಾಹನಗಳ ಪಾರ್ಕಿಂಗ್ ತಾಣವೋ ಎಂಬ ಪ್ರಶ್ನೆ ಎದುರಾಗಿದೆ.
ಮಾರ್ಕ್ ಹಾಕಿದರೂ ಬಗೆಹರಿಯದ ಸಮಸ್ಯೆ
ಬಸ್ ನಿಲ್ದಾಣದಲ್ಲಿ ವಾಹನಗಳ ಪಾರ್ಕಿಂಗ್‌ಗೆ ಸಂಬಂಧಿಸಿದಂತೆ ಪುರಸಭೆಯವರು ಮಾರ್ಕ್ ಹಾಕಿ ಹೋಗಿದ್ದಾರೆ. ಆದರೆ ಆ ಮಾರ್ಕ್‌ಗಳು ಮಾಸುವ ಮುನ್ನವೇ ಪುರಸಭೆಯವರು ಎಚ್ಚೆತ್ತುಕೊಂಡು ವ್ಯವಸ್ಥೆಯನ್ನು ಸರಿಪಡಿಸಬೇಕು ಎಂಬ ಒತ್ತಾಯ ಕೇಳಿಬಂದಿದೆ. ಮಾರ್ಕ್ ಹಾಕಿ ಬಹಳ ದಿನಗಳಾದರೂ ವಾಹನಗಳ ನಿಲುಗಡೆ ವ್ಯವಸ್ಥೆಯಲ್ಲಿ ಬದಲಾವಣೆಯಾಗಿಲ್ಲ ಎನ್ನುವ ಅಭಿಪ್ರಾಯಗಳು ಕೇಳಿಬರುತ್ತಿದೆ.
ಬಸ್ ನಿಲ್ದಾಣದೊಳಗೆ ಬಸ್ಸುಗಳು ಯಾವ ರೀತಿಯಲ್ಲಿ ಪ್ರವೇಶಿಸಬೇಕು, ಎಲ್ಲಿ ನಿಲ್ಲಿಸಬೇಕು ಎಂಬುದನ್ನು ಗುರುತಿಸಲಾಗಿದ್ದರೂ, ಆ ಸ್ಥಳಗಳಲ್ಲಿ ಕಾರುಗಳು ಸೇರಿದಂತೆ ಇತರ ವಾಹನಗಳನ್ನು ನಿಲ್ಲಿಸಲಾಗುತ್ತಿದೆ. ಇದರಿಂದ ಬಸ್ಸುಗಳು ನಿಲ್ದಾಣದೊಳಗೆ ತಿರುಗಿಸಲು ತೊಂದರೆಯಾಗುತ್ತಿದೆ. ಬಸ್ಸುಗಳು ಸುಗಮವಾಗಿ ಸಂಚರಿಸಲು ಅಗತ್ಯವಾದ ಸ್ಥಳವೂ ವಾಹನಗಳ ಪಾರ್ಕಿಂಗ್‌ನಿಂದ ಅಡ್ಡಿಯಾಗುತ್ತಿದೆ.
ಭರವಸೆ ನೀಡಿ ತಿಂಗಳುಗಳಾದರೂ ಕ್ರಮವಿಲ್ಲ
ಪುರಸಭೆಯವರು ಸಮಸ್ಯೆ ಸರಿಪಡಿಸುವುದಾಗಿ ಹೇಳಿ ಒಂದೆರಡು ತಿಂಗಳು ಕಳೆದಿವೆ. ಮಳೆಗಾಲ ಮುಗಿದ ಬಳಿಕ ವ್ಯವಸ್ಥೆ ಸರಿಪಡಿಸುವುದಾಗಿ ತಿಳಿಸಲಾಗಿತ್ತು. ಆದರೆ ಮಳೆಗಾಲ ಮುಗಿದು ಎರಡು ತಿಂಗಳು ಕಳೆದರೂ ಸಮಸ್ಯೆ ಹಾಗೆಯೇ ಉಳಿದಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಲಾಗಿದೆ.
ದೊಡ್ಡದಾದ ಬಸ್ ನಿಲ್ದಾಣದಲ್ಲಿಯೇ ಬಸ್ಸುಗಳನ್ನು ನಿಲ್ಲಿಸಲು ಚಾಲಕರು ತೀವ್ರ ತೊಂದರೆ ಅನುಭವಿಸುವಂತಾಗಿದೆ. ಬಸ್ ನಿಲ್ದಾಣದೊಳಗೆ ಪ್ರವೇಶಿಸುವಾಗ ನಿಲುಗಡೆ ಮಾಡಿರುವ ಕಾರುಗಳ ನಡುವೆ ದಾರಿ ಮಾಡಿಕೊಂಡು ಬರಬೇಕಾದ ಪರಿಸ್ಥಿತಿಯಿದೆ. ಕೆಲವು ಕಡೆ ವಾಹನಗಳ ನಡುವೆ ಜಾಗವಿಲ್ಲದೆ ಬಸ್ಸುಗಳನ್ನು ತಿರುಗಿಸುವುದೂ ಕಷ್ಟವಾಗುತ್ತಿದೆ.
ಬಸ್ ನಿಲ್ದಾಣದಲ್ಲಿ ವಾಹನಗಳನ್ನು ಎಲ್ಲಿ ಹೇಗೆ ನಿಲ್ಲಿಸಬೇಕು ಎಂಬುದರ ಕುರಿತು ಪುರಸಭೆಯವರು ಸ್ಪಷ್ಟ ವ್ಯವಸ್ಥೆ ಮಾಡಬೇಕು. ಸಾರ್ವಜನಿಕ ವಾಹನಗಳ ನಿಲುಗಡೆಗೆ ಮಾತ್ರ ಮೀಸಲಾಗಿರಬೇಕಾದ ಸ್ಥಳದಲ್ಲಿ ಅನಧಿಕೃತ ಪಾರ್ಕಿಂಗ್‌ಗೆ ಅವಕಾಶ ನೀಡಿದರೆ ಬಸ್ಸುಗಳ ಸಂಚಾರಕ್ಕೆ ತೊಂದರೆ ತಪ್ಪುವುದಿಲ್ಲ ಎಂಬುದು ಆಕ್ಷೇಪವಾಗಿದೆ. ಹೆಸರಿಗೆ ಮಾತ್ರ ಬಸ್ ನಿಲ್ದಾಣವಾಗಿದ್ದು, ವಾಸ್ತವದಲ್ಲಿ ಪಾರ್ಕಿಂಗ್ ತಾಣದಂತಾಗಿದೆ ಎಂಬ ಅಸಮಾಧಾನವೂ ವ್ಯಕ್ತವಾಗಿದೆ.
About The Author
